Կոնտենտ մարքեթինգի ամենակարևոր և մեծ արագությամբ տարածվող բաղադրիչներից մեկը վիզուալ կոնտենտն է: Գրագետ վիզուալ կոնտենտ ստեղծելն այնքան էլ հեշտ չէ: Բացի երևակայությունից, այն պահանջում է նաև դիզայներական գործիքների հետ աշխատելու կարողություն:

Վիզուալ կոնտենտի տեսակներից մեծ տարածում է ստանում ինֆոգրաֆիկան:

Ի՞նչ է ինֆոգրաֆիկան:

Ինֆորմացիա հաղորդելու միջոց է, որի նպատակն է գրաֆիկական պատկերների օգնությամբ հնարավորինս պարզ մատուցել բարդ ինֆորմացիան:

Օրինակ՝

Ինչպե՞ս ինքնուրույն ստեղծել ինֆոգրաֆիկա:

Ներկայացնում ենք ինֆոգրաֆիկա ստեղծելու 5 պարզ և անվճար գործիք:

1. Canva

Canva-ով աշխատելու համար անհրաժեշտ է Facebook-ի կամ Google-ի Ձեր հաշվի միջոցով մուտք գործել համակարգ: Շատ հարմար գործիք է պարզ ինֆոգրաֆիկաներ ստեղծելու համար: Սակայն հաշվի առեք, որ Canva-ն վիճակագրական գրաֆիկներ ստեղծելու հնարավորություն չի տալիս. Դուք ինքներդ պետք է վերբեռնեք դրանք`  որպես նկար:

Ունի թե՛ անվճար, և թե՛ վճարովի գործիքներ:

2. Piktochart

Սա հրաշալի գործիք է, եթե ուզում եք համեմատաբար հագեցած ինֆոգրաֆիկա ստեղծել:  Canva-ի համեմատությամբ՝ Piktochart-ի ընձեռած հնարավորությունները և գործիքները ավելի շատ են: Դրանք փորձարկելն ու հնարավորությունները բացահայտելը որոշ ժամանակ կխլեն, սակայն արդյունքը դրան արժե:

Առավելություններից է նաև այն, որ թույլ է տալիս YouTube-ից կամ Vimeo-ից տեսանյութ ներդնել ձեր ինֆորգրաֆիկայի մեջ:

3 . Vizualize.me

Այս գործիքը նախատեսված է CV-ներ վիզուալացնելու համար: Ավանդական թղթային տարբերակով կամ տեքստային ֆորմատով CV-ները բավականաչափ գրավիչ չեն: Vizualize.me-ով կարող եք առանց դժվարության և շատ արագ վիզուլացնել Ձեր մասնագիտական ձեռքբերումները:

4. Easel.ly

Ինֆոգրաֆիկաներ ստեղծելու ևս մեկ պարզ գործիք է Easel.ly-ն: Այստեղ հնարավորություն ունեք մուտքագրել թվային տվյալներ և ստանալ դրանց համապատասխան գրաֆիկական պատկերները:

5. Venngage

Այս գործիքը աչքի է ընկնում թեմփլեյթների բազմազանությամբ:  Ինֆոգրաֆիկա ստեղծելուց առաջ ընտրում ենք տեսակը (վիճակագրական, տեղեկատվական, համեմատություն և այլն): Եթե  սոց. մեդիայի համար եք ինֆոգրաֆիկա ստեղծում, Venngage-ում կան թեմփլեյթներ՝ նախատեսված կոնկրետ սոցցանցերի համար:

---

ArmContent-ին կարող եք հետևել նաև Facebook-ում, Twitter-ում և GooglePlus-ում:

---

Իհարկե, սրանք սիրողական գործիքներ են և չեն կարող ամբողջությամբ փոխարինել Photoshop, Illustrator և այլ պրոֆեսիոնալ գրաֆիկական ծրագրերին: Սակայն եթե Դուք դիզայներ չեք և ցանկանում եք ինքնուրույն ստեղծել գրավիչ ու հետաքրքիր ինֆոգրաֆիկաներ, վերը նշված գործիքները կօգնեն Ձեզ:

Վիզուալ կոնտենտի մյուս տեսակներին կանդրադառնանք հաջորդ հրապարակումներում:

Հեղինակ՝ Տաթևիկ Թորաբյան: